අප සේවාදායකයාගේ අවශ්‍යතාව වූයේ නිවසේ ව්‍යුහාත්මක ඉදිකිරීම්, ගෙබිම සහ නානකාමර ඇතුළු නිවසේ විවිධ කොන්ක්‍රීට් අවශ්‍යතා සඳහා එකසේ යොදාගත හැකි, කාර්යක්ෂම බවින් ඉහළ, හැසිරවීමේ පහසු කොන්ක්‍රීට් විසඳුමකි. අපේක්ෂිත පිරිවැය ඇතුළත පරම්පරා ගණනක් පවතින නිවසක් ඉදිකිරීම ඔවුන්ගේ මූලික බලාපොරොත්තුව විය.

ස්ලැබ් සහ කුළුණු වැනි ව්‍යුහාත්මක ඉදිකිරීම් සඳහා වඩාත් සුදුසුම විසඳුමක් වූ මෙය 20-150mm අතර අවපාතයකින් (ස්ලම්ප්) යුතු, C15 සිට C45 දක්වා වූ ශක්ති පන්තිවලින් ලබාගැනීමේ හැකියාව පවතී.
වැඩකිරීමේ හැකියාව ද ඉතා ඉහළ මට්ටමක පවතින අතර කුඩා ප්‍රමාණයේ වාණිජ ගොඩනැඟිලි, නිවාස, කාණු පද්ධති, කර්මාන්තශාලා බිම් සහ මහල් ගොඩනැඟිලිවල පහළ තට්ටු සඳහා වඩාත් යෝග්‍යය.

මහල් 50ට වැඩි මෙවැනි උස් ගොඩනැගිලි ව්‍යාපෘති සඳහා ඉහළ උසකට පොම්ප කිරීමට හැකි ද්‍රාව්‍යමය ගුණය වැඩි කොන්ක්‍රීට් මිශ්‍රණයක් අවශ්‍යවේ. සිමෙන්තිමය අමුද්‍රව්‍ය සහ රසායනික ඇඩ්මික්ෂර් නිවැරදි අනුපාතයට මිශ්‍රකළ, දිගු ස්ටේෂනරි පොම්ප භාවිතයෙන් ඉතා ඉහළ උසකට පහසුවෙන් පොම්ප කළහැකි කොන්ක්‍රීට් වර්ගයක් මේ සඳහා භාවිතා කළ යුතුය.

විසංගමනය (ගල් සහ සිමෙන්ති වෙන්වෙන්ව කැටිගැසීම) අවම, ඉහළ ද්‍රාව්‍යමය ගුණයෙන් යුතු විශේෂ TOKYO SUPERMIX මිශ්‍රණය නිසා 150mට වැඩි ඉහළ උසකට පහසුවෙන් කොන්ක්‍රීට් පොම්ප කළ හැකි විය. ද්‍රාව්‍යමය කොන්ක්‍රිට් ඝනීභවනය වීමේ ක්‍රියාවලිය හෙවත් Rheology සංලක්ෂණයන්ට අනුව අවපාතය (ස්ලම්ප්) 225mm සහ අවපාත ගලනය (ස්ලම්ප් ෆ්ලො) 450-600mm ලෙස පවත්වා ගැනිනි.
ශ්‍රී ලාංකේය ගොඩනැගිලි ඉතිහාසයේ සුවිශේෂී සන්ධිස්ථානයක් සලකුණු කරන මෙම ව්‍යාපෘතියේ විශාලත්වය සහ කාලසටහන අනුව, කොන්ක්‍රීට් තොග ඇණවුම් කළ සැණින් සැපයීමට හැකිවීම, ව්‍යාපෘතිය බාර බහුජාතික විශේෂඥයින් විසින් සැපයුම්කරුවකු තෝරාගැනිම උදෙසා යොදාගත් ප්‍රමුඛතම නිර්ණායකයක් විය. ඕනෑම පරිමාවක පාරිභෝගික අවශ්‍යතාවන් එසැණින් සපුරාලීමට හැකියාව ලබාදෙන, නවීනතම පොම්ප රථ සහ මිශ්‍රණ ට්‍රක් රථ සිය ගණනකින් සමන්විත දැවැන්ත ප්‍රවාහන බලකාය අප සතු වීම මෙහිදී ප්‍රධානතම විශේෂත්වය ලෙස සැලකිණි.

කොන්ක්‍රීට් කුළුණු / ස්ථම්භ පයිලින් වැඩවලදී කොන්ක්‍රීට් මිශ්‍රණයේ සුමට බව මෙන්ම ඉතා ඉහළ ද්‍රවශීලකතාවක් පැවතීම අත්‍යවශ්‍ය කාරණයක් වන්නේ, යකඩ කම්බි රාමු යෙදූ වලවල් තුළට මැනවින් කොන්ක්‍රීට් පිරවීම සිදු කළ යුතු නිසාවෙනි. පයිල් බැස්සවීම තරමක කාලයක් ගතවන කාර්යයක් නිසා, පයිලින් වැඩවලදී එකම ආකාරයෙන් මිශ්‍රණය පවත්වා ගැනීම විශේෂයෙන් සැලකිලිමත් වියයුතු කරුණකි.

අවපාතය (ස්ලම්ප් අගය) 180-220mm වූ මෙම සුවිශේෂී මිශ්‍රණ සංයුතිය ස්ථානීය පයිලින් වැඩ සඳහා වඩාත් සුදුසු වන අතර ‘ට්‍රිමී පයිප්ප’ ක්‍රමවේදය භාවිත කරන නිසා වැඩි ද්‍රවශීලකතාවයක් සහිතව සකසනු ලබයි. කැටි ගැසීම්වලින් තොරව, පළමු තොගයේ ස්ලම්ප් මට්ටම අවසන් තොගය දක්වාම ඒකාකාරීව පවත්වා ගැනීම සඳහා හොඳම අමුද්‍රව්‍ය සහ ඇඩ්මික්ෂර් යොදා ගැනීම සිදු කරයි.
සාමාන්‍යයෙන් මෙරට ඉදිකිරීම් කටයුතුවලදී පයිල් එකක විශ්කම්භය 600mm සිට 2000mm දක්වා අතර අගයක් ගන්නා අතර, ගැඹුර 25mm - 45m පමණ වේ. මේ සඳහා යොදාගන්නා ශක්ති පන්ති පරාසය වන්නේ C30 - C50 වේ.

ඉතා උස් මහල් ගොඩනැඟිලිවල බර දරාගත හැකිවන පරිදි එහි කුළුණුවල පාදම කොටස් විශාලව සකස් කළ යුතු වුවත්, සීමිත ඉඩකඩ පිළිබඳ ගැටලුව සහ වාහන නැවැත්වීමේ අංගන මෙන්ම වෙනත් වාණිජ කටයුතු සඳහා ද පහත මාලයන් භාවිත කරන නිසා, විශාලත්වයෙන් සහ පරිධියෙන් අඩු නමුත් සවිශක්තියෙන් ඉතා ඉහළ කොන්ක්‍රීට් කුළුණු භාවිතා කිරීමට සිදුවේ.
මෙම අවශ්‍යතාව සපුරාලිය හැකි එකම විසඳුම වන්නේ, C70 සහ C85 ශක්ති පන්තිවලින් යුතු අති-අධිශක්ති කොන්ක්‍රීට් පමණකි.

ශ්‍රී ලංකාවේ C70 සහ C85 ශක්ති පන්තිවලින් යුතු එකම අති-අධිශක්ති කොන්ක්‍රීට් මාදිලිය නිපදවනු ලබන්නේ TOKYO SUPERMIX විසින් පමණක් වන බැවින්, මෙම ව්‍යාපෘතිය සඳහා නිර්දේශිත එකම කොන්ක්‍රීට් සැපයුම්කරු බවට පත් වන්නට ටෝකියෝ සුපර්මික්ස් සමාගමට හැකිවිය.
ශක්තියෙන් ඉහළ NIPPON CEMENT PRO OPC සිමෙන්තියෙන් ලබාදෙන අධිශක්තිය මෙම කොන්ක්‍රීට් මාදිලියේ ප්‍රධානතම සුවිශේෂී සාධකය වන අතර, ජල භාවිතය අවම කරවන Poly Carboxylic Ether වර්ගයේ රසායනික ඇඩ්මික්ෂර් භාවිතයෙන් සුපිරි සවිමත් බව එලෙසින්ම පවත්වා ගැනීමට හැකිවීම ද මෙහි විශේෂත්වයන් වේ. ටෝකියෝ සුපර්මික්ස් විද්‍යාගාරයන්හි සහ තවත් සීමිත ස්ථාන කිහිපයක පමණක් ඇති අතිනවීන පරීක්ෂණ යන්ත්‍ර මඟින් මෙම සීමිත පාරිභෝගික අවශ්‍යතාවට හරියටම ගැළපෙන නිෂ්පාදනයන් පිළිබඳ පරීක්ෂණ සිදු කරගැනීමේ හැකියාව පැවතීම අපගේ විශේෂීකරණයේ සහතිකයයි.

ස්ලැබ්වල පසු-ආතතීකරණ ක්‍රියාවලිය, පෙර-වාත්තු කළ බාල්ක (precast girders), ලිස්සන සැටලිම් හා ස්ථානීය පාලම් තට්ටු වැනි කටයුතු සඳහා ආරම්භක ශක්තිය වැඩි කොන්ක්‍රීට් අවශ්‍ය වේ.

මෙම සුවිශේෂී කොන්ක්‍රීට් මිශ්‍රණයේ ශක්තිමත්බව ආරම්භයේදී වැඩි අතර පසු-ආතතීකරණ ක්‍රියාවලිය, සැටලිම කලින් ඉවත් කිරීම, සැටලිම වරින් වර මාරු කිරීම වැනි කටයුතු වඩාත් පහසු කරයි. සිමෙන්තිවල ගුණාත්මක බව සහ ජලය සහ සිමෙන්ති අතර අනුපාතය ද මෙම සුවිශේෂී මිශ්‍රණයේ ශක්තිය සඳහා බලපාන වැදගත්ම සාධකයකි. දින දෙකකට පසු සැටලිම ඉවත් කිරීම සහ ලිස්සන සැටලිම පැයට 15-30cm ප්‍රමාණයකින් ගමන්කරවීම සඳහා මෙවැනි කොන්ක්‍රීට් නිෂ්පාදනයක් අවශ්‍ය වේ. එමෙන්ම, සමස්ත ව්‍යුහයේ කොන්ක්‍රීට් බාල්ක ප්‍රමාණය අවම කරගැනීමටත්, බාල්කවල ඝනකම අඩු කිරීමටත්, විශාල ඉදිකිරීමක නම් කොන්ක්‍රීට් දැමීමේ ක්‍රියාවලිය අඛණ්ඩව ඉදිරියට යාමටත් මෙය ඉවහල් වේ.

කොළඹ සමුද්‍රාසන්න ගොඩබිම් තීරයේ සහ පොදුවේ කොළඹ නාගරික අවකාශය තුළ ඉදිවන ඉදිකිරීම් සඳහා කල්පවතින කොන්ක්‍රීට් විශේෂයෙන් භාවිත කරනු ලබයි. වගුරු සහිත හෝ සමුද්‍රාශ්‍රිත රළු පරිසර තත්ත්වයන් යටතේ සිදුකරන ඉදිකිරීම් සඳහා, සල්ෆේට් සහ ක්ලෝරයිඩ් විඛාදනයට ප්‍රතිරෝධය දක්වන, අඩු ජල අවශෝෂණයක් ඇති කල්පවතින කොන්ක්‍රීට් වර්ගයක් අවශ්‍ය වේ.

විශේෂ කල්පවතින කොන්ක්‍රීට් මිශ්‍රණයන්ට එහි රසායනික සහ ජල ප්‍රතිරෝධී ගුණයන් ලබාදෙන්නේ ගල් අඟුරු දහනයෙන් ඉවතලන Fly Ash මිශ්‍රිත TOKYO SUPER PLUS සමඟ සිලිකා වාෂ්ප සහ යබොර (GGBS) වැනි අනෙකුත් සං‍යෝග විශේෂ සංයුතියකට අනුව මිශ්‍ර කිරීමෙනි. මේ නිසා ක්ලෝරයිඩ් සහ සල්ෆර් අඩංගු රසායන ද්‍රව්‍ය කාවැදීමෙන් සිදුවිය හැකි හානි වළක්වන ඝනව ඇසිරුණු කොන්ක්‍රීට් මිශ්‍රණයක් ලබාදේ.
ටෝකියෝ සුපර්මික්ස් සතු විද්‍යාගාරය හැරුණු විට, එක් රාජ්‍ය විශ්වවිද්‍යාලයක පමණක් මීට අදාළ රසායනාගාර පරික්ෂාවන් සිදු කිරීමේ හැකියාව පවතියි.

මෙම ව්‍යාපෘතිය පුරා දක්නට ලැබෙන සුවිශේෂි වාස්තුවිද්‍යාත්මක ලක්ෂණයක් වන්නේ විශේෂයෙන් එක් කරන ලද නිර්මාණාත්මක ගෘහඅලංකරණ කොටස් ඉදිකිරීමේ සෑම මට්ටමකම පැවතීමයි. ගොඩනැගිල්ලේ පාදම මත විශාල පීඩනයක් එකතු නොවනසේ මෙම අනන්‍ය නිර්මාණාත්මක කොටස් එකතු කරගැනීමට, ශක්තිමත් නමුත් සැහැල්ලු කොන්ක්‍රීට් වර්ගයක අවශ්‍යතාව මතු වූ අතර එම ව්‍යුහවල සවිමත් බව එක ලෙස පවත්වා ගැනීම ද අවශ්‍යව පැවතිනි. තවද, හෝටල් සහ මහල් නිවාස සංකීර්ණවල ඉහළ මහල්වල පිහිටි මුළුතැන්ගෙවල් සහ නාන තටාක සඳහා මෙන්ම ව්‍යුහවල අඩුපාඩු සැකසීම සඳහා ද බරින් අඩු, සවිමත් කොන්ක්‍රීට් වර්ගයක අවශ්‍යතාවය පැවතිණි.

සංකීර්ණ ඉදිකිරීම්වල මුළු ව්‍යුහයේ බර වැඩි නොවන ලෙස, කොන්ක්‍රීට් කොටස් අතර හිස් අවකාශ පිරවීමට සහ ගොඩනැගිල්ලේ විවිධ භාවිතාවන් උදෙසා බිම් මට්ටම වැඩි කරවීමට යොදාගත හැකි ඝණත්වය අවම වන සේ (600 - 1200 Kg/m3) සකස් කළ මෙම සං‍යෝගය ටෝකියෝ සුපර්මික්ස් වෙතින් පමණක්ම ලබා ගත හැකි කොන්ක්‍රීට් මාදිලියකි. TOKYO SUPERMIX පමණක් සතු විශේෂිත රසායනික පෙණ මිශ්‍රණ තාක්ෂණය භාවිතයෙන් නිපදවන මෙම සැහැල්ලු කොන්ක්‍රීට් සම්මිශ්‍රණය අපගේ විශේෂ විසඳුම් අතරින් එකකි.

ඝණකමින් වැඩි අත්තිවාරම් සහ විශාල කොන්ක්‍රීට් කුළුණු/බාල්ක ඉදිකිරීමේදී, ව්‍යුහය අභ්‍යන්තරයේ උෂ්ණත්වය 72-75°C ට වඩා අඩුවෙන් පවත්වා ගැනීම කොන්ක්‍රීට් ඉරිතැලීම හා පුපුරායාම වළක්වා ගැනීමට අතිශයින් වැදගත් වේ.

අඩු තාපවිමෝචක කොන්ක්‍රීට් සකස් කිරීමේදී, නියම ප්‍රමිතියෙන් යුතු අමුද්‍රව්‍ය, ජලය සහ සිමෙන්ති යන සියල්ලේම උෂ්ණත්වය අවම මට්ටමක පවත්වා ගැනීම අත්‍යවශ්‍ය වන අතර, මේ සඳහා විද්‍යාත්මක දැනුමින් යුතු ඉන්ජිනේරු විශේෂඥයන්ගේ සහාය මෙන්ම නවීන තාක්ෂණික උපකරණ රැසක් ද අවශ්‍ය වේ. මීට අමතරව, ඉහළ ධාරිතාවක් ඇති සිසිලන යන්ත්‍ර, අයිස් ඇඹරුම් යන්ත්‍ර, මහා පරිමාණ ශීතකරණ බහාලුම් වැනි සුවිශේෂී යන්ත්‍රසූත්‍ර ද මෙම කාර්යය සඳහා යොදාගනු ලබයි. ඉහත සියලු අංගයන්ගේ දායකත්වය ඇතිව ඉදිකිරීම් කටයුතුවලදී උෂ්ණත්වය 26°C වැනි ඉතා සාමාන්‍ය මට්ටමකින් පවත්වා ගැනීමට TOKYO SUPERMIX සමත්ව ඇත.

මෙහිදී මූලික අවශ්‍යතාවය වූයේ ශීතාගාර ගබඩා සංකීර්ණයක නිරතුරුව සිදුවන උෂ්ණත්වය අධික ලෙස උච්ඡාවචනය වීම නිසා කොන්ක්‍රීට් ගොඩනැඟිල්ලට සිදුවන හානිය වළක්වා ගැනීමයි.

Fly Ash සමඟ විශේෂ අමුද්‍රව්‍ය කිහිපයක සංයෝගයෙන් නිපදවනු ලබන මෙම කොන්ක්‍රීට් මාදිලිය, උෂ්ණත්වය වෙනස්වීම නිසා සිදුවන ක්ෂණික ප්‍රසාරණය හා හැකිලීමෙන් කොන්ක්‍රීට් ව්‍යුහය ඉරිතැලීම හා පුපුරායාමෙන් වන හානිය වළක්වා ගැනීමට උපකාරී වේ.

ඉරිතැලීම අවම කරගැනීම සඳහා, දාර රහිත සුපිරි සමතල බිමක් සේවාදායකයාගේ අවශ්‍යතාවය විය.

ප්‍රවේශමෙන් තෝරාගන්නා ලද අමුද්‍රව්‍ය සහ නිවැරදි රසායනික ඇඩ්මික්ෂර් සංයෝග කිරීමෙන්, බන්ධන හැකියාව වැඩිදියුණු කරනලද වායු බුබුළු රහිත මනා ගෙබිමක් නිර්මාණය කරන ලදී. වානේ කම්බි රාමු වෙනුවට වානේ ෆයිබර් යොදා ගැනීම නිසා ඉරිතැලීම් අවදානම අවම විය.

ඇතැම් විශාල ව්‍යුහයන් සඳහා කොන්ක්‍රීට් යෙදීමේදී, වානේ ආධාරක සැකිල්ල තුළට කොන්ක්‍රීට් සංයුක්ත කිරීම සඳහා විශාල කම්කරු ශ්‍රමයක් සහ කාලයක් අවශ්‍ය වීම, සමස්ත ව්‍යාපෘතියේ කාර්යක්ෂමතාවයට බලපාන කාරණයකි.

ස්වයං සංයුක්ත කොන්ක්‍රීට් නිෂ්පාදනය කරනු ලබන්නේ නිසි ප්‍රමිතියෙන් යුතු රළු සමාහාරක සහ නිවැරදි ප්‍රමාණයට රසායනික ඇඩ්මික්ෂර් සංයෝග කිරීමෙනි. මෙමඟින් ස්වයංක්‍රීයව කොන්ක්‍රීට් සංයුක්ත කිරීම සිදුවන නිසා ඒ සඳහා වැය වන මිනිස් ශ්‍රමය මෙන්ම කාලය ද ඉතිරි කරගත හැකිය.
ඉතා පහසුවෙන් ගලායන ද්‍රාවමය කොන්ක්‍රීට් මාදිලියක් වන නිසා සැටලිම ඇතුළත වානේ කම්බි සැකිල්ලට පුරා ඒකාකාරීව ස්වයංක්‍රීයව පැතිරයාමේ හැකියාව ද ඇත. මේ නිසා පෝකර් කම්පක භාවිතය අවශ්‍ය නොවන අතර කොන්ක්‍රීට් තුළ සිදුරු ඇති වීමක් ද සිදු නොවේ. තෙත් ස්වරූපයෙන් පවතින අතරතුර වැඩකිරීමට ඇති පහසුව මනින පරීක්ෂණ ක්‍රම වන V-පුනීල/අවපාත ගලනය (ස්ලම්ප් ෆ්ලෝ) සහ J-Ring/L-Box තුළට පහසුවෙන් පිරවීමේ හා ගලායාමේ හැකියාව ද මෙම ස්වයං සංයුක්ත කොන්ක්‍රීට් මිශ්‍රණයේ ඉතා ඉහළ අගයක් ගනී. ඉහත පරීක්ෂණ මඟින් මෙම විශේෂ කොන්ක්‍රීට් මිශ්‍රණයේ විසංගමනය (ගල් සහ සිමෙන්ති වෙන්වෙන්ව කැටිගැසීම) අවම බව ද සනාථ කොට ඇත.

ගොඩනැඟිලි කිහිපයකින් සුසැදි කාර්යාල සංකීර්ණයක් ලෙසින් සැලසුම් කළ එක්සත් ජනපද නව තානාපති කාර්යාලයේ ඉදිකිරීමේ ක්‍රියාවලිය සහ යොදාගන්නා අමුද්‍රව්‍ය පවා එරට ඉංජිනේරු ප්‍රමිතීන්, පරිසර හිතකාමී නියාමන මෙන්ම ඉදිකිරීම් ක්‍රමවේදවලට අනුගතව සිදුකළ යුතු විය. එමෙන්ම, මෙම ඉදිකිරීම එරට හරිත ගොඩනැඟිලි කවුන්සිලය යටතේ ලියාපදිංචිය ලැබූවක් වූ අතර, එම කවුන්සිලය මඟින් පිරිනමන Leadership in Energy and Environmental Design (LEED®) හරිත ගොඩනැඟිලි ඇගයුම් ක්‍රමවේදය යටතේ අධීක්ෂණයට ලක්කරන ලදුව LEED® රිදී තත්ත්ව සහතිකය හිමිකර ගැනීමට නිර්දේශ ලබාඇත. කොළඹ නගරය කේන්ද්‍රව වෙරළාසන්නයේ ඉදිකරන බැවින් විඛාදනයන්ට හොඳින් ඔරොත්තු දීම සහ කල්පැවැත්ම පිළිබඳව ද විශේෂ අවධානයක් යොමු කළ යුතු විය.

මෙම සුවිශේෂී කොන්ක්‍රීට් සංයෝගය මුල්වරට නිපදවනු ලැබුවේ එක්සත් ජනපද තාන්පති කාර්යාල සංකීර්ණයේ ඉදිකිරීම් අවශ්‍යතාව වෙනුවෙනි. විශේෂඥ නිර්දේශයන්ට අනුකූලව සකස් කරන ලද මෙය විඛාදනයන්ට ප්‍රතිරෝධීව ක්‍රියා කරන රසායනික සංඝටක එක් කිරීම නිසා කල්පැවැත්ම අතින් ඉතා ඉහළ මට්ටමේ කොන්ක්‍රීට් මාදිලියකි.

ජලය කාවැදීම අවම මට්ටමක පැවතිම ඕනෑම කොන්ක්‍රීට් ව්‍යුහයක කල්පැවත්ම සඳහා වන මූලික අවශ්‍යතාවකි. ජල ටැංකි, නාන තටාක සහ භූගත ඉදිකිරීම්වලදී මෙය විශේෂයෙන්ම සැලකිලිමත් විය යුතු කරුණකි.

ජල ප්‍රතිරෝධී අමුද්‍රව්‍ය සහ සිමෙන්ති අමුද්‍රව්‍ය සංයෝග කොට නිපදවනු ලබන කොන්ක්‍රීට් මිශ්‍රණයක් වන මෙහි ජල:සිමෙන්ති අනුපාතය ඉතා අඩු නිසා ඝණත්වයෙන් වැඩි වන අතර ජලය උරාගැනීම ද ඉතා අවම වේ. මෙය භූගත ව්‍යුහ සහ ජල ටැංකි සඳහා විශේෂයෙන් සුදුසු කොන්ක්‍රීට් මාදිලියකි.

ජලය යට කරනු ලබන ඉදිකිරීම්වලදී මුහුණපාන ප්‍රධානතම අභියෝගය වන්නේ කොන්ක්‍රීට් දැමීමේදී එහි සිමෙන්ති සහ වැලි ජලයෙන් සේදීයාම වළක්වා ගැනීමයි. මේ සඳහා, ජලයේ විවිධ ලවණතා මට්ටම්වලට ඔරොත්තු දෙන ඉහළ බන්ධන ශක්තියක් ඇති රසායනික සංයුතියකින් යුතු කොන්ක්‍රීට් මිශ්‍රණයක් භාවිතා කළ යුතු වේ.

ජල ඛාදනය අවම වන සේ සුවිශේෂී රසායනික සංයෝගයක් අනුව නිපදවනු ලැබූ මෙම කොන්ක්‍රීට් මාදිලිය, වානේ ආවරණයක් තුළට පිරවීම සඳහා උකු තරලයක ආකාරයෙන් සකස් කරනු ලබයි.

ඉහළම නිමාවකින් හා දැකුම්කළු පෙනුමකින් යුතු ගොඩනැඟිලි නිර්මාණකරණයේ නවතම මෝස්තරය වනුයේ වර්ණ ගැන්වූ කොන්ක්‍රීට් යොදාගනිමින් ගෘහ අලංකරණය කිරීම ව්‍යාපෘතියේ අවශ්‍යතාව විය. වර්ණ ගැන්වූ කොන්ක්‍රීට් යොදා ගනිමින් නිම කළ බිත්ති මෙන්ම ස්ලැබ්, නඩත්තුවලින් තොරව පවත්වා ගෙන යා හැකි වීම ද මෙය කාර්‍යක්ශම මෙන්ම ලාභදායී තෝරාගැනීමක් බවට පත් කර ඇත.

කොන්ක්‍රීට් මිශ්‍රණයට වර්ණක සමඟ නිසි පදමට සිමෙන්ති අමුද්‍රව්‍ය සහ රසායනික ඇඩ්මික්ෂර් සංයෝග කිරීමෙන් මෙම සුවිශේෂී කොන්ක්‍රීට් මාදිලිය නිපදවනු ලබයි. අවපැහැ ගැන්වීම්වලින් තොර මෙය, ටෝකියෝ සුපර්මික්ස් විසින් උසස්ම තත්ත්වයේ පිරිසිදු සුමුදු සමාහාරක (නිෂ්පාදිත සියුම් වැලි) පමණක් යොදා නිපදවන කොන්ක්‍රීට් විශේෂයක් වන බැවින්, නිසි උපකරණ යොදාගෙන ඔප දැමීමෙන් උසස් නිමාවකින් යුතු මතුපිටක් ලබා ගත හැකි අතරම, අමතර නඩත්තු කිරීමක් ද අවශ්‍ය නොවේ. තවද, වැක්ස් කිරීම හෝ විශේෂ ජල ප්‍රතිරෝධක ආලේප භාවිතය ද අවශ්‍ය නොවන අතර ජලය යොදා මොප් කිරීම පමණක් ප්‍රමාණවත් වේ.

නිරාවරණිත කොන්ක්‍රීට් ඉදිකිරීමක් වූ මෙම ව්‍යාපෘතිය සඳහා කල්පැවැත්මෙන් වැඩි නඩත්තුවක් ද අවශ්‍ය නොවන සුවිශේෂී කොන්ක්‍රීට් මාදිලියක් අවශ්‍ය වූ අතර, විශේෂ හැඩැති සැටලිම ඉවත් කළ පසු දාර නොපෙන ආකාරයේ සුමට නිමාවකින් යුතු වීම ද අපේක්ෂිත ලක්ෂණයක් විය.

කල්පැවැත්මෙන් ඉහළ සහ නඩත්තුවලින් තොර සුමට මතුපිටක් සඳහා මෙම සුවිශේෂී කොන්ක්‍රීට් මිශ්‍රණ සකස් කොට ඇත. ඉහළ ද්‍රවශීලතාවයකින් යුතු මෙහි, නිවැරදි අනුපාතයකට අනුව සියුම් සමාහාරක කොටස් මිශ්‍ර කොට ඇති නිසා මනා නිමාවක් ද කල්පවතින පෙනුමක් ද ලබා ගත හැකිය. ද්‍රාව්‍යමය කොන්ක්‍රිට් ඝනීභවනය වීමේ ක්‍රියාවලිය හෙවත් Rheology සංලක්ෂණයන්ට අනුව අවපාතය (ස්ලම්ප් අගය) වැඩි කොන්ක්‍රීට් නිපැයුමක් වන නිසා කැටි ගැසීම සහ වැගිරීමක් ද සිදු නොවන ලෙස පවත්වා ගැනිණි.

අමතර නිමාවකින් තොරව සුමට කොන්ක්‍රීට් නිමාවක් ලබා ගැනීම මෙම ව්‍යාපෘතියේ අපේක්ෂිත අරමුණ විය. සමස්ත පෙනුම ඉතා සුමටව සහ ඒකාකාරී වර්ණයකින් පවත්වා ගැනීම සහ ලේටෙක්ස් සැටලින් භාවිතයෙන් කොන්ක්‍රීට් මතුපිට ‘දැවමය වයිරම්’ නිමාවක් ලබා ගැනීමද අවශ්‍යතාවන් ලෙස හඳුනාගෙන තිබිණ. තවද, සමස්ත ඉදිකිරීමේ ඒකාකාරී උසස් නිමාව පවත්වා ගැනීම සඳහා සැටලින්වලට යොදාගන්නා ලේටෙක්ස් අච්චු පිරිසිදුව, හැඩය නොවෙනස්ව භාවිතා කිරීමේ හැකියාව ද කොන්ත්‍රාත්කරුගේ විශේෂ අවශ්‍යතාවක් ලෙස සඳහන් කරන ලදී. වර්ණය සහ මතුපිට ස්වභාවය ඒකාකාරීව පවත්වා ගනිමින් උසස් ගෘහනිර්මාණාත්මක නිමාවක් ලබාදෙන කොන්ක්‍රීට් මාදිලියක් සැපයීම අප මෙම ව්‍යාපෘතියේදී මුහුණ දුන් ප්‍රධාන අභියෝගය විය.

ඉතා සියුම් නිෂ්පාදිත වැලි සහ සංයෝග කළ ද්‍රාව සිමෙන්ති මිශ්‍ර කොට නිපදවන මෙම කොන්ක්‍රීට් මාදිලිය සඳහා PCE රසායනික ඇඩ්මික්ෂර් භාවිතා කරනු ලබයි. සම්පූර්ණ ව්‍යාපෘතිය පුරා යොදාගන්නා අමුද්‍රව්‍යවල ස්ථායීත්වය ඒකාකාරීව පවත්වා ගැනීම සඳහා ප්‍රමිතිය සහතික කරන ලද Tokyo Supersand නිෂ්පාදිත වැලි පමණක් යොදා ගැනිණි. සියුම් හැඩතල මතුකරගැනීම උදෙසා නැවුම් කොන්ක්‍රීට් මිශ්‍රණයේ නිදේශිත සාන්ද්‍රණය අඛණ්ඩව පවත්වා ගැනීමට, කොන්ක්‍රීට් ආලේප කිරීමේ ක්‍රියාවලිය රාත්‍රී කාලයේ සිදුකරන ලදී.

ගංඟා වැලිවල හිඟකම සහ අධික මිල නිසා ගෙබිම් සඳහා ‘සාම්ප්‍රදායික සිමෙන්ති/කොන්ක්‍රීට් ආලේපිත පොළොව’ වෙනුවට කාර්යක්ෂම විකල්පයක අවශ්‍යතාව, විශේෂයෙන්ම සුඛෝපභෝගී මහා පරිමාණ නිවාස සංකීර්ණ ආශ්‍රිතව මතු විය. දක්ෂ පුහුණු පෙදරේරුවන්ගේ හිඟය ද වර්තමානයේ දැඩිව මතු වී ඇති ගැටලුවක් නිසා, උසස් නිමාවක් අවම ශ්‍රම භාවිතයෙන් කරගැනීම ද අභියෝගයකි.

සියුම් වැලි අංශු වැඩි වශයෙන් පවතින නොසේදූ නිෂ්පාදිත වැලි සමඟ සංයෝග කළ ද්‍රාව සිමෙන්ති යොදාගනිමින් නිපදවන මෙම කොන්ක්‍රීට් මාදිලිය සඳහා PCE ඇඩ්මික්ෂර් යොදාගනු ලබයි. මෙම සංයෝගයේ පොම්ප කළ හැකි ආකාරයේ ද්‍රාව්‍යශීලී ගුණය ඉතා ඉහළ මට්ටමක පවතී. පහසුවෙන් ගලායන ස්වභාවය නිසා, මහල් නිවාසවල ගෙබිම් වැනි විශාල පෘෂ්ටයන්, දිගින් වැඩි මට්ටම් උපකරණ භාවිතයෙන් කෙටි කාලයක් ඇතුළත සමතලා කරගැනීමේ හැකියාව ඇත.

අධිවේගී මාර්ගයේ නව කැලණි පාලමේ සිට ඉඟුරුකඩේ හන්දිය සහ ඔරුගොඩවත්ත හන්දිය දක්වා කොටස් ඉදි කෙරුණේ වානේ ව්‍යුහයන් මතය. දෙපස පිහිටි ආධාරක කුළුණු දෙකක් මත පිහිටි තට්ටුවක් ලෙස ඉදිවන මෙම අධිවේගී මාර්ගයේ, ඇස්පෝල්ට් කාපට් ස්ථරය නිම කිරීමට පෙර වානේ තහඩුවේ පතුළ කොටස කොන්ක්‍රීට්වලින් ආවරණය කිරීමට අවශ්‍ය වූයේ ජල කාන්දුවලින් ආරක්ෂා කරනු පිණිසය. මෙම අධිවේගී මාර්ගයේ ආයුකාලය වසර සියයක් ලෙස ගණනය කර තිබිණි. වානේ තහඩු පතුළ විඛාදනයෙන් ආරක්ෂා කරගැනීම සඳහා ආරක්ෂිත තීන්ත ස්ථර කිහිපයක් ආලේප කර තිබුන ද, කොන්ක්‍රීට් තට්ටුවේ ඇතිවිය හැකි සියුම් සිදුරු හෝ ඉරිතැලීම් හරහා ‘ජලය’ හෝ ‘වාතය’ ඇතුළු වීම මුළුමනින්ම වළක්වාලීම ව්‍යාපෘතියේ මූලික අවශ්‍යතා අතර විය.

කොන්ක්‍රීට් ස්ථරයේ ඇතිවන හැකිලීම් පූරණය කර, ඇතුළතින් විස්තාරණය වීමට ක්‍රියාකරන රසායනික අමුද්‍රව්‍ය යොදා නිපදවනු ලබන ඉහළ ක්‍රියාකාරී කොන්ක්‍රීට් මාදිලියකි. මෙමඟින් කොන්ක්‍රීට් මත ඇතිවන සියුම් ඉරිතැලීම්, පැලීම් ආදිය වළක්වන අතරම, ජල රෝධක ගුණාංග නිසා කොන්ක්‍රීට් ව්‍යුහයේ ආයු කාලය සහතික කළ හැකි නිපැයුමකි.

කණින ලද ඉදිකිරීම් භූමියේ පාංශු ස්ථාවරත්වය පවත්වා ගැනීම, එක්සත් ජනපද තානාපති කාර්යාල ව්‍යාපෘතියේ අවශ්‍යතාව වූ අතර, ඇල්ටෙයාර් ව්‍යාපෘතියේදී පරිධිය ආසන්නයේ කුලුණුවල අඩුපාඩු සැකසීම සඳහා සුදුසු විසඳුමක් අවශ්‍ය විය. ඉහත අවස්ථා දෙකේම පොදු අවශ්‍යතාව වූයේ අඩු වියදම් තුනී කොන්ක්‍රීට් ස්ථරයකි.

අඩු වියදම් කොන්ක්‍රීට් ක්‍රමයක් වන මෙය, 0-5 mm පරිමාණයේ සියුම් සමාහාරක (නිෂ්පාදිත සියුම් වැලි) සහ 5-14 mm චිප්ස් යොදා ගනිමින් ඉතා තුනී කොන්ක්‍රීට් ස්තරයක් වන ලෙස නිෂ්පාදනය කරනු ලබයි. විශේෂ පොම්පයක් ආධාරයෙන් මතුපිටට රසායනික තීව්‍රකයක් සමඟ කොන්ක්‍රීට් ඉසීම මෙහිදී සිදුවේ. විශේෂ පොම්පයක් ආධාරයෙන්, සවිමත් කිරීමට අවශ්‍ය මුහුණත මතුපිටට ක්ෂණිකව සවිවීම සඳහා භාවිතා කරන රසායනික තීව්‍රකයක්, කොන්ක්‍රීට් මිශ්‍රණය සමඟ මුසු වනසේ එකවිට ම ඉසිනු ලබයි.